Objavio: Portal Poduckun
U nike kraje se namesto rabota reče tlaka (Bregi, Zvoneća). Danas se za rabotu reče radna akcija.
Rabote su bile delo za selo ko su delali seljani okoli sela i po selu. Delali su kada ni bilo poljskih del po njivah i po finitku košnje. Na rabote je zval župan kada je zatulil u goveji rog pa su se seljani stekli na „zbor.“ Na pomoć mu je bil vrdijan. Za zvat ljude na rabotu je bil i crkveni zgon kada je zaklinkal samo na jenu stran.
U staro vrime su vlastelini urdinali kmeton rabote, a kada kmetstva već ni bilo, su rabote bile dobrovoljne, kako je i danas.
Šlo se je popravljat pute za vozit z vozon u goru i čistit potok u polje Brusan, založilo škulje, batudalo i ravnalo pute po selu. Spametin se, jimil san jeno osan let, okoli 1957.leta su batudali i ravnali put zdola škole (Poli Bogića, raspela z križon) doli do Križ puta, a to je križišće puta proti Štacjonu, priko glavne ceste za Šapljane. Spametin se batića z dugin toporišćon za batudat.
Na slikah se vidi omladina ka batuda put poli Šplinkinih proti Domu i Kapužišćon i slika mužaki 1979.leta. ki su kopali kanal ud Goranjega proti Dolanjemu kraju (naslovna fotografija).
Dno lokve su potaracala goveda doklje jih se je gnalo napojit pa ni propušćala, a kada je presušila je dno rabilo zamašit z jilon. Popravljalo se je i suhe zide na kamunal okoli sela.
Delo za selo je bilo tudi delat plesišća, pa pošumljavanje, sadnja smrikvic, ali borići na kamunal. Pošumljavali smo i mi dica, a prvo nas i dica ka su vadile talijanske maestre.
Našal san u školske dnevnike zapišeno da su maestre talijanske peljale dicu u povodu “feste degli alberi“, svečanosti drveća. U školski dnevnik piše da su 11.11. 1930. leta posadili 250 črnih bori (pino nero) na Pineta di Brusan i Zabaticu, a kašnje 1931. leta 150 črnih bori, i 1932. leta 150 črnih bori i 50 smrikvic (piše abete rosso) se na dan 11.11.
To su bori Za Baticu i bori na Rijave ramontine. Sadili su i u Boršt, ex. Kazerma talijanske vojske, mi je povidal Milan Surina, Kundin (roj.1933) i da je bila tamo vojska z šatori. Jimili da su vježbu, pa da su hodila dica zas sela z gavetami po jidaču.
Veliko delo za selo su storili seljani ki su delali ručna dela na pripremi terena za kulturni dom i si ki su “dali ruku”, jimili su “kapota” (Milan Surina, Kundin) ki je organiziral. Potlje je delala i mehanizacija, pute za u Mandinu staju, ud Kazarmete u Brusan i proti Jurašovemu lazu.
Mi školska dica smo sadili boriće na sam dan Svetega Jožefa okoli leta 1959. zgora Velike doline i pod Grabarje.
Šumari priporučaju da bi danas rabilo posić bore i posadit listopadna drva. Meni je u bore lipo i zdravo je u borovu šumu ma struku rabi poslušat, aš si ljudi se znaju, a oni su stručnjaki.
U nike kraje se namesto rabota reče tlaka (Bregi, Zvoneća). Danas se za rabotu reče radna akcija.
Napisal: J.O.Hrvatin
Lanterna © Torpedo.media Izrada internet stranica @ More idea