[MIROVINA] Gordan Filinić: Jedanput pompjer – vavek pompjer!

Od svojga dela i od karijeri govori s puno jubavi – reć će kako je vela čast i privilegija delat kako pompjer. Bit celega života juden na usluge, oćutit zahvalnost kad si nekemu pomogal va najtežeh momenteh, neprocjenjivo je. Tu jubav je prenesal i na sina Enniota ki je danas isto pompjer, dela v Reke. Mejten, pride vreme kad čovek mora podvuć crtu i reć – vreme je za poć va penziju.

S početkun juna meseca ovega leta va penziju je šal Gordan Filinić. Napunil je 41 leto redovnega radnega staža, od česa najveći del va pompjereh – najprvo v Reke, pa od 2009. leta v Opatije na meste zamjenika zapovjedniku Mladenu Šćulcu, a pokle – puneh devet let – kako zapovjednik opatijskeh pompjeri i na kraje još va Zagrebe, kade je tri leta bil pomoćnik glavnega vatrogasnega zapovjednika za logistiku va Hrvatskoj vatrogasnoj zajednice. Š njin smo poćakulali od tega kako je počel va ten dele, koliko mu je značilo i ča planira daje.

– Va familje je bilo dosta pompjeri: moji kujini, neput i kunjado su pompjeri. Kad san finil školu, nisan jušto znal ča bin delal, nekako san sam sebe „iskal“ – poduralo je to morda i desetak let, da san delal na više mesti. Onda je prišal i Domovinski rat devedeseteh let, kada smo svi počeli mislet na jedan drugačji način. Juden trebe pomoć, takova su vremena. I tu san se našal, va pompjereh, zajno san znal da je to delo va ken ću ostat – povedel nan je Gordi, kako ga prijateli zovu. Finil je prekvalifikaciju za pompjera, ku se j' moglo storit v Reke i ka je durala devet meseci, a pokle je v Reke ostal i delat. Smejuć se govori kako je onda opet počel va školu hodit i na neki način od onda je stalno bil va škole, aš da je cjeloživotno obrazovanje va vatrogastve morda važneje nego va nijenen drugen dele. Od klimatskeh promjeni, preko materijali od keh se dela mobilija do tehnologije kako ča su litij-ionske baterije i električni auti, pompjeri se stalno moraju usavršavat i vadit nove stvari.

– Pred dve leta finil san i Ratnu školu „Ban Josip Jelačić“ va Zagrebe. Oduševila me j' struktura našeh oružaneh snagi, ma va prven rede znanje ko mi je ta škola dala: jednu velu nadogradnju ča se tiče stožernega upravljanja. Nanke ne moran govorit za prijateljstva ka san tamo stekal – osin hrvaskeh, bilo je tu i časniki z Bosni, Makedoniji i Sloveniji. Uglavnon, vela mi je čast da san imel priliku to finit aš se s tun školun dobije i jedna „širina“ za bilo kakovu vanrednu situaciju – rekal je i dodal da mu j' to bilo posebe interesantno aš je već imel čuda praktičnega iskustva va sličneh situacijah, na priliku kad je bil potres va Petrinje.

Od svojga dela i od karijeri govori s puno jubavi – reć će kako je vela čast i privilegija delat kako pompjer. Bit celega života juden na usluge, oćutit zahvalnost kad si nekemu pomogal va najtežeh momenteh, neprocjenjivo je. Tu jubav je prenesal i na sina Enniota ki je danas isto pompjer, dela v Reke. Mejten, pride vreme kad čovek mora podvuć crtu i reć – vreme je za poć va penziju.

Koliko je to bilo teško?

– Ni mi bilo teško to odlučit. Čovek mora znat kade mu je granica. Da se razumemo, ja se ćutin kako da bin mogal delat još baren deset let. Vavek rečen da skupa s nami, i naše familje na neki mod postanu pompjeri. Neku dobu bi trebalo bit dosta tega. Mejten, to ča san šal va penziju ne znači da san se fermal! Bit ću aktivan i daje, samo ne više va stalnen radnen odnose. Sad iman čuda više vremena i sigurno ću pomoć kad god nekemu bude rabilo. Va DVD Lovran san zamjenik predsjednika, a, magari san va penzije, još „uskočin“ i HVZ-u, ako trebe kamo poć ili ča pomoć – špjegal je Gordi ki žive onu krilaticu „jedanput pompjer – vavek pompjer“ dodajuć kako je va sven ča je delal vavek imel podršku familje: ženi Suzi, i dece Enniota i Eliji. Od mala je familja dobila još jednega člana, mićega unučića Karlota, pa ono ča Gordija posebe veseli je ča sada, va penzije ima više vremena za njih, ma anke za još jednu životnu jubav, a to je – jedrenje:

– Bordižan od 1976. leta. Đani Mamić mi je bil sused dok san bival v Opatije, pul 40 boxa, i najboji prijatel, a skupa smo i jedrili. I kako se to uža dogodit, puti su nan se razdvojili, pa san imel jednu dugu pauzu od jedrenja. Mejten, pred pet let smo se trefili na mule, pa mi je rekal da bordiža, da ima jedrilicu, ma da mu fali flokist. I tako smo opet počeli… Đani naviga, pa jedrimo kad je tu i mislin da ćemo tako nastavit dok nan zdravje dozvoli, aš skupa imamo 120 let! Morda mi fali malo fizičke spremnosti, ali parićujemo se za svaku regatu, evo, sad smo na Creskoj regate bili šesti. Preko leta će nan bit mića pauza, ali ćemo se već počet parićevat za državno prvenstvo na kraj devetega meseca!

Magari će reć da bi rad malo počinut, Gordi je jedan od oneh ki si dela vavek najde. Ili delo najde njega, kako se zame. A kad ni angažiran drugde, ovi letnji dani najraje pasuje va vrte i okol kući na Dobreće. Lešica z malo salati, pomidori, tikvic, cikli, kumari, a z druge strani voćke… Zgojit svojo povrće i voće, reć bi, još je jedan gušt novopečenega penzionera. Jedno je sigurno – ni va penzije mu neće bit štufno!

Za List Opatija
Piše: Elena Vidović